
Tapiwa Editor Makopa
Nyanduri wenyu, Tapiwa Editor Makopa, akaberekwa musi wa11 Gunyana 1969 kuMasvingo kwaChivi mudunhu rashe Madan’ombe. Ndiye mwana mukuru mumhuri ine vana vasere, vakomana vatatu nevasikana vashanu. Akadzidza paMadan’ombe Primary school. Akazobvapo ondoita zvidzidzo zvesecondary paChibi High School apo akapedza gwaro re ‘O’ level. Akazotsvaga basa ndokushandira macompany akasiyana-siyana kuZvishavane, Kadoma neHarare. Akazoenda paHarare Polytechnic kunoita zvidzidzo zvekushanda mumatura eruzivo kana kuti amabhuku inonzi nerurimi rwechirungu Library and Information Science padanho reNational Certificate. Apedza zvidzidzo izvi akazondoshandira paLibrary of Parliament muHarare. Akashandira Library of Parliament kubva 1995 kusvika 2008 apo akazotsvaka mafuro manyoro. Akazobva kuparamende oinda kunoshanda saLibrarian kuScanlen and Holderness Legal Practitioners inova kambani yemagweta. Nyanduri akaroora uye ane vana vaviri, mukomana nemusikana. Anofarira kunyora nhetembo, nganonyorwa nekuteerera mimhanzi zvikuru yevaimbi vemuZimbabwe.

Mhezi Yavavira Moyo
2026Uyu muunganidzwa wenhetembo dzanyanduri dzeShona. Parizvino nyanduri arikugadzirisa muunganidzwa zvakare. Nyanduri arikuyedza chaizvo kubudisa mutakunanzva wenhetembo dzinovaka, dzinotsiura, dzinoraira, dzerudo nedzekutenda. Igangaidza mukwenyi chairo, mhezi yavavira moyo. Verengai mutapirirwe nemutauro wedu wakapfuma.

Yakaparira Parere Nhema
2026Mumhuri maMufudze maita dambudziko rekuti mwanakomana waMufudze ashaya mbereko mumba make nemudzimai wake. Setsika yavanoziva yaishandiswa pasichigare, Mufudze nehanzvadzi yake vanoruka zano rekuti mwanakomana mudiki apindire asike moto mumba memukoma wake sezvo munin'ina uyu ane mwana nakare. Zano rinorukwa zvakanaka rozadziswa vachifunga kuti vagona asi hapana chinobuda. Vanobva vapererwa voti regain tinobvunzira kwagodobori Gurundoro kuti chii chirikuitika. Gurundoro kunodziti povo povo keche mwarara hakata, chitokwadzima, nhokwara, kwami nachirume, haa wanei makukutu oga oga. Nyakutumwa apindira naiyewo akanga asina moto. Ko mwana akanga achinzi ndewake akanga ari waaniko? Ichokwadi, mangachena YAKAPARIRA PARERE NHEMA.








